Ko Ngā Kaitiaki ō ngā Taonga Whitiāhua
Ko Ngā Kaitiaki o Ngā Taonga Whitiāhua tētahi
tino pūtahi taonga whitiāhua o Aotearoa. I whakatūria
tēnei rōpū hei poari kaitiaki i te tau 1981. He poari
kaitiaki tō te iwi nei, he kanohi nō te hunga mahi pikitia,
nō te hunga whata taonga, nō ngā rōpū Māori
me ērā atu rōpū hapori.
Kei te tuhinga kaupapa taketake o Ngā Taonga Whitiāhua te kī, ka
pūmau tonu rātou ki te kohikohi, ki te tiaki otirā ki te whakaatu
i ngā taonga whitiāhua, i ngā taonga pouaka whakaata tuku iho i
roto i ngā tau. Kei roto i te kaupapa o Ngā Taonga Whitiāhua ngā
tino mātāpono o Te Tiriti o Waitangi, arā, kei roto i ōna
kaupapa here me āna tikanga mahi. Kei Ngā Taonga Whitiāhua te mana
kaitiaki kia whakapūmautia te rangatiratanga o nga kaituku nā rātou
nga taonga i takoha ki te kohinga, ā, māna anō hoki e whakatika
kia mau tonu te manatārua, te mana pupuri taonga hinengaro, me ngā whāinga
tika ki ngā taonga tuku iho, ki ngā kaituku.
He tino kohinga whai take Te Kohinga Taonga Māori e pā ana ki te iwi
Māori. Ka kitea ngā whakaahua maha o ngā tāngata, o ngā
hapū, o ngā iwi, mai i te tau 1901 ki nāianei, i roto i ngā
whitiāhua, i ngā rīpene ataata me ngā tuhinga roa. Ka kitea
he āhuatanga noho i ētahi o ngā pikitia tuatahi kua ngaro noa atu
i te tirohanga kanohi.
Kua tohua he whakaahua o Tā āpirana Ngata, o Rua Kēnana, o Te Puea
Hērangi me ētahi atu rangatira. He tini ngā whakaahua ā whatu,
ā taringa hoki, inā rā he karanga, he whaikōrero, he kōrero
tuku iho ā iwi, ā hapū, he pōwhiri, he wharenui, he marae,
he kapa haka, he āhuatanga nō te rā o Waitangi (mai i te tau 1934),
he whakaaturanga whatu kākahu, he tukutuku, he whakairo, me ērā
atu mea katoa.
Kaupapa
I mahi Ngā Kaitiaki o Ngā Taonga Whitiāhua, āna kaimahi
me ōna kaitiaki kia whakaurua atu nga ritenga o Te Tiriti o
Waitangi ki ōna kaupapa here me āna tikanga mahi, inā
hoki, i tuhia tēnei mea te taonga i Te Upoko Tuarua o Te Tiriti.
Nā te mea he pātaka a Ngā Taonga Whitiāhua mō
tēnei mea te taonga, e whai wāhi mai ana te Tiriti mō
te taha mahi tahi, mō te whai wāhi mai o te iwi Māori,
me te mana kaitiaki o te Karauna.
Download the Kaupapa (PDF, 76K)
Whakatakotoranga
Ka taea e ngā tangata katoa te whakatakoto taonga ki Ngā Taonga Whitiāhua,
kāore he utu.
Ahakoa e takoto ana tētahi mea i roto i te Archive, ko te mana o taua taonga
ka noho tonu ki te kaiwhakatakoto, ā, ko te manatārua ka noho ki te
hunga āhei ki te tā i raro i te Ture. Ka āhei hoki te kaiwhakatakoto
te whakarite here ki runga ki aua taonga, ki tā rātou e tika ana.
Hei te whakaurungaa atu o tētahi taonga ka tuhia tētahi kirimana i waenganui
i te kaiwhakatakoto me Ngā Taonga Whitiāhua. E rua ngā kirimana
ka whakawāteatia, te Kirimana Whakatakoto o Ngā Taonga Māori me
Te Kirimana Whakatakoto Whānui.
Mō ētahi atu kōrero e pā ana ki te whakatakoto taonga,
mō ngā Kirimana Whakatakoto rānei, tirohia Acquisition
and Deposit. Ki te hiahia koe ki te kōrerorero mō
te whakatakoto i tētahi mea ki te kohinga Taonga Māori,
whakapā atu ki ngā Kaupapa Maori. Email
|
